EMBRACE September 2019

Na Tanghou 5 leh Sa-nga 2 bang ahia?
–Chingngaihlian Tunglut

Thudik lah hi, lah a pom haksa mahmah khat chu, hiai khovel ah i om sung uh haksatna kichi bei ngei lou ding chih ahi.
Haksatna i tuah chiang in, a vengsak na ding in Pathian in Nna hong sem pahpah leh i chi hi.

I Toupa nnasepdaan i theihchian sem na ding in, I Toupa Jesu lei a a omlai a A nnasepte lak ah mi 5000 a vakna tuni’n ngaihtuahthak le’ng i chi hi.

{{Mi 5000 i chih chiah inn lusi a mi i sim sek daan toh kibang ahi. Innsung pa/pasal khat pen innkuan khat daan a ana sim uh chihna ahi. Innkuan khat a pasal khat kia huaimun a hoh om tham di’n i gingta hi. Huchi ahih leh, innkuankuan a hoh le tam ding un gintaat huai hi. Laisiangthou suutsiamte’n milip 10, 000 val tham pha ding un gingta uh hi. Hiai ka hon gen sau na ziak ahih leh, mi tampitak te’n a theihlouh ziak un ‘Numei’ leh ‘Naupang’ thusimlouhna leh pasal sang a dinmun niam zo a koih a nelsiah na ding peuh in zang sek uh hi. Zakdah huai kasa. I Toupa’n leng mi nuaisiahna khong zo haw lo di eive, adiak a A Thu pansan a numeite nuaisiah khong bang.}}

Awle, i gen tup pen ah lut nawn ta le’ng: Jesu Khris in mi huai zah Khalam a dangtaak (a dang taak taktak teng) amuh chiang in, khotuah mahmah hi. Khalam ann chouh a ana chawm lou in, mipi tengteng (a lemchingte leng sim tel in) Sa-lam poimoh ding leng ana ngaihtuahsak tham tham hi.
Mipi huaizah in (sa-lam gil vahna, mipi hi luihluih lak nuamsak ziak a leh mi hih ziak a va tei ringot te sim tel in), Amah delh tuntun mai uh, ana ma-khelh zezen uh. Kibukmangsan theih vuallouh ding a ana zong ua, ana delh uh hitel hi. Nek leh taak, giahna di tanpha (basic needs) ki khuallou a Jesu ana ngai ua ana delh uh hiveh aw.

Dotna khat ki dong zual leng: En huchituk in Pathian i delh tuntun ngei hia, i Salam poimoh (basic needs) mangngilh zen in? Anuam thei pen a delh kisawm zo sek hi’n ka chian hi. Anop louh zek chia phun toh thuah pah zomah lai maw?

Huchi i va delh tuntun chiang in hon thawnkiksak ngei mahmah lou kia hilou in, hon na dawn in, i va ki gen le ngai lou in i poimohte hon na ngaihtuahsak khinta ana hi sek hi. Amah lam i zot himhim chiang in Khalam leh Sa-lam a i poimoh hon hih buchin sak gige hi chih Johan 6:5-15 leh Luke 15: 11-31 ah i mu hi. Ephesate 3:20 ah leng , i nget leh lam-et sang a tam zo thamtham hon sepsak thei chih i mu hi. Thupi in lamdang lua zahngaihna’ Pathian! Halleluiah!

Ahia lah, Mi 10,000 valte avak lai in, Jesu in a omsa Tanghou 5 leh Sa-nga 2 zang sese hi. Thil siam tengteng a omlou apat a a omsak Pa’n i haksatna a hon hutkhiak na di’n thil omsa a pansan sese gige kei chih leng ithei hi. Ei mimal natawm a zattak leh zatna di khat le omlou ahih lai a le, a min thupina ding a zattak leh zatna ding a hon omsak Pa ahi.
Khalam leh Salam a i haksat a, panpih i poimoh chiang a ei mimal ah hi’n mi tungtawn ah hitaleh, Nna a hong sep i deih tuntun hun atam hi. Huchia Nna ahong sep na ding in, Ephesate 1:3 a i muh bang in, i Van Pa’n A tapa Jesu Khris tungtawn in Khalam vualzawlna chikim a hon piaksate pen ahun, amun leh i thil tuahte dungzui in a zang thei hi.
Toupa’n panpihna i poimahna a Nna asep na ding in, en le Ama hon piaksa te i neihlam i ki phawk ngai hi. Huai khit chiang a, Amah kiang tut di leng i moh puak mah ahi hi. Amah kiang tun leng, Aman a hih ding daan thei lua hi.
Pathian in Jesu Khris tungtawn in Nna hong sem khin a, a hong sep nawn na ding in, i pansan di ahon piaksate/eilam a i hih di omte hih masa lou in Amah thillamdang hong sem ding in lam-en mawk kei ni. En i hih di i hih leh, Toupa’n Ama hih di theilua hi.
Huai ziak in i tanghou 5 leh Sa-nga nih pen Ama hon piaksa mah, Ama kiang mah va tut ding ahihlam, haksatna i tuah chiang in theih gige sawm ni. I tanghou 5 leh Sa-nga nih i kep ama kiang i tut ding om ahi chih thei gige ni.

Simtute tengteng, Jesu Khris min in, Toupa Pathian in eilam a i sep di omte sem khe thei chiat ding in theihtelna leh hatna hon pe chiat hen.