DAWNNA: Johan 14:16, 17 I sim masa zual ding: “Huan, Pa ka ngen dia, aman Khamuanpa dang a hon pe ding, khantawn a na kiang ua om din; huai tuh thutak Kha ahi; Khovel in huai a nei theikei hi, amah a muhlouh a, a theihlouh behlap ziak in; nou tuh amah na thei ua, na kiang uah a om gige ngal a, noumau ah a om ding ahi.”

Hiai tang I sim ahihleh Jesu Khrist kamsuak ahi. A nungzuite kianga a gen ahi. Ama sihzoh chiang a, lawm bei leh panpihtu neilou a omlou ding uh ahihdan a theihsakna ahi. Amah a kiang uah taksa in om nawnkei mahleh, patauh nang omlou; amaute ompih a tonpih ding Khamuanpa (Kha) Toupa’n pe ding ahihdan a genna ahi.

Hiai tang a “Khamuanpa” kichi pen Muslim ten Prophet Muhammad genna ahi, chi in pang uhi. I theihsiam ding a poimoh masa ahihleh Islam sahkhua ah kilakna himhim progressive/superseeding in pom uhi. Hiai bang genna hiam I chihleh kilakna (revelation) khat AD 60 in om henlan, a zoh kilakna dangkhat AD 90 in om nawn taleh, kilakna nanung pen in a masapen nulmang a, a latest penpen kha a poimohpen leh a dik a pom in omzel hi. Hiai pen Law of Abrogation kichi hi. Delhi High Court order khat Supreme Court in a overrule dan pian ahi. Huaiziak in, Muslim ten Jesu pen prophet in pom tham uhi. Himahleh, Jesu nung a Muhammad hong pai ahihman in, Muhammad pen a tungnung zaw ahi, chi in pom uhi. Huaiziak in, ei Khristian ten “Jesu lou a dang omlou” ichih chiang a Muslimte a ding a offensive law mahmah ana hi mah ahi. Hiai context/background theisiam masa kawm in hiai Muslimte panna (argument/position) pen dawnna tamlou I pe ding awle.

1. Muslimte pansan ahihleh Koran a Surah 61:6 a “O Children of Israel! I am the apostle of God…giving glad tidings of an Apostle to come after me. Whose name shall be Ahmad,” chih kigelh ahi. Hiai a “Ahmad” kichi term pen Arabic meaning ahihleh “praised one” chihna ahi. A Greek equivalent ahihleh “periclytos” ahi. Periclytos meaning ahihleh “praised one” ahi. Tanchinhoih Johan gelh (Gospel of John) pen Johan in Pathian apan theihsakna toh a gelh ahi.  Aman a original Greek text ah “Khamuanpa” genna ding in periclytos (Ahmad) zanglou a, paraclete (Helper) zang hi. Ancient New Testament manuscript 5600 val omte lakah paraclete kizatna ding a periclytos a kizatkhakna omlou hi. Hiai tegel term kizangtuah (interchanged usage) ngeilou hi. Huaiziak in, Johan in “Ahmad” term pen zanglou hi. Muslimte panna a dik na ding in Johan in word zangkhial kha hiam, ahihkei leh translator ten letkhiak kha uh ahi chih a prove uh ngai ding hi. Hiai Greek manuscript te a chetna (evidence) a deihkhop kei uleh New Testament manuscript tuamtuam (Latin, Syriac, Coptic, etc.) dang 20,000 val om hi. Huaite a vaveel chet uh poimoh ding hi.  The ball is in their court.

2. V.16 a word khat mallak lou in, a passage bang simsuak suk zek le hiai a Khamuanpa kigen pen Jesu Khrist mah in genchian suk khin hi. Johan 14:26 ah “Huan, Khamuanpa, Kha Siangthou, Pa in ka min a hon sawl ding pa’n bangkim nou hon sinsak ding a, na kiang ua ka gen tengteng nou a hon thei khesak nawn ding hi,” chih kigelh hi. Hiai ah Jesu mahmah in hiai “Khamuanpa” pen amah sihzoh chiang a hongtung ding “Kha Siangthou” ahihdan a min mahmah lou in genchian hi. Jesu Khrist in leng ana theikhial kha eive chih ngamhuai taktak ding ahi diam?

3. Johan 14:16 mah I sim leleng hiai Khamuanpa pen nungzuite ngei pe ding ahihdan a chiang hi. Tua nungzuite damlai mah in, Pentecost Day a piak in om ngei uhi. Prophet Muhammad ichih hiai a Jesu nungzuite sihzoh nung kum 500 vel zoh a hong ompan ahi.

4. Johan 14:16 mah ah hiai “Khamuanpa” pen nungzuite kianga a khantawn a om ding ahihdan kigen hi. Huaiziak in, ei 21^st Century hun a nungzuite kiangah leng hiai “Khamuanpa – Kha Siangthou” omden lai hi. Prophet Muhammad pen a sihna sawt lawta a (8^th June, 632 AD), ka math siamlouh toh kum bangzah paita hiam chih leng ka hisap peihkei hi. Tangtawn a om den bel hilou peuhmah hi.

5. Johan 14:17 ah Jesu’n a nungzuite kiangah hiai “Khamuanpa” pen khovel in theikei mahleh “nou tuh amah na thei ua” a chi hi. Prophet Muhammad pen hiai hunlai zoh kum 500 val a piang pan ahihman in nungzuiten Muhammad ana theihchiat ding uh tuh gintak haksatak ahi, Pathian hilou ahihman un.

6. Johan 14:17 mah ah Jesu’n hiai “Khamuanpa” pen “nou mau ah a om ding ahi” ana chi hi. ESV in “You know him, for he dwells with you and will be in you” achi hi. Hiai ah word neu khakha in poimohna lian taktak nei uhi. Khasiangthou Pentecost Day a hongtun ma in leng nungzuite kiang ah om hi (dwells with you). Himahleh Pentecost Day a kipan in nungzuite sung ah tengta hi (will be in you). “Will be” chih teng inleng hiai a Jesu’n nungzuite a hilh lai a Pentecost Day tung nailou ahihdan a taklang hi. Hiai tang ah Jesu Khrist ngei in gingtute sung a teng pen Kha Siangthou ahihdan gen hi. Gingtute sung a Muhammad tenglou ahi chih theihchiat ding ahi.

7. Johan 14:26 ah Jesu’n “Khamuanpa” pen Toupa’n ama min (Jesu min) a hon sawl ding ahihdan gen hi. Muslimte kianga Muhammad pen Jesu min a hongpai ahi khawng I va chih laizang lebel buaihuai mahmah kha ding hi. Superseeding revelation a gintak dan uh I gen khinta ahi. “Khamuanpa” pen Jesu Min a hongpai ahih lechu Muhammad ahikei chih a chiang mai hi.

8. Johan 16:14 ah Jesu’n “Khamuanpa” toh kisai a genzom touhna ah “Aman kei hon pahtawi ding a…” ana chi hi. Prophet Muhammad in Jesu pahtawi lou hi. A nungzuite khut a Jesu nungzui hihna ziak a si simseng ding hi nawnlou hi.

Genbeh theih tampi omlai ding a, himahleh hiaiteng inleng chiang huntawk ding in I gingta hi. Hiai bang a Muslimte panna pen in Laisiangthou muanhuaina chou kha a, Jesu Khrist muanhuaina chou kha a, Johan laigelhte muanhuaina chou kha hi. I ginna toh kikalh bilbel ahihman in hiai bang thuvek (propaganda) te a I puklouh teitei a poimoh hi.

Toupa’n saptuamte thudik thei a, gum ngam ding in hon ompih chiat hen.