EMBRACE August 2019

Gospel Camp Committee te saina in Nupa seminar Pathian ompihna toh lohchingtak in izou thei uhi. Hiai seminar hun a igenkhawmte uh tamlou chik enthak leng chi in kon koihkhia hi. Nupa ichih a bawltu leh a designtu om a, amah Pathian ahi chih ithei hi. Ama deih bang leh a design bang a nupa hong khosaklouh chiang un nupa kisiatna, innkuan kisiatna leh khotang kisiatna tan hon tun hi. Pathian in nupa a ding a tup leh ngim hoihtak a neih bang in melmapa setan inle nei ahi chih mangngilh kei ni. Nupa a piangthak, Pathian lau, Pathian deih bang a Nupa hinkhua hon zat chiang un Pathian tup leh ngim subuching thei uhi.

Pathian in nupa kitenna a design ahihman in Amah le a sung ah om leh kitenna pen lohching hi. Kitenna tuh Triangle lim toh teh theih hi. Pathian a tung ah om a, a nuai ah akil langkhat tuak ah zi leh pasal om hi. Nupa a Pathian lam a hon naih semsem chiang un a nupa uh kimatsemsem uhi. Pathian hon gamlat chiang unlah a nupa kal bang uleng hong kigamla hi. Nupa tamtak Pathian tup leh ngim lamlam le phawk khalou in haksatna a tuah chiang un kikhen ding ngaihtuah pahpah uhi. Khenkhat lah vakikhen di lah hi salou deuh, lah nupa kal buai den pawl om uhi. Si lah hilou hing minpu achih bang a nupa hing minpu kitam lua hi. Nupa kal a itna a dau gawp pen bangchi suk hing thak ding? Ngaihtuah in na nei ngei hiam? Pathian in hon siam nasan na ngaihtuah ngei hiam? Pathian in mohpuakna hon piak na bangchi sepkhiak a? Eilam pang a ihih ding tampi om ahi chih thei in, Nupa lohching ihihna ding in theih tawp suah in panla teitei ni. Tua hileh I biak Pathian in hon vualzawl ngeingei ding hi.

Zi leh Pasal kibatna leh kibatlouhna: Pathian hon bawldan leh i koppihte i muhdan akibang hiam? Pathian tanu/tapa kemtu in na kikoih ngei hiam? Na etdan in thupaw mahmah ding hi.

Pasal leh Numei kibatna/kikimna: Pasal in zite niam zaw leh poimoh lou zaw dan a na ngaihtuah leh ngaihtuah khial mahmah ding nahi.

1. Pasal leh numei Pathian batpih a bawl (Gen.1:27).
2. Pathian hehpihna hinna tangkhawm (1 Pet.3:7).
3. Kha thilpiak tangkhawm (1 Kor.12).
4. Toupa thilgel dan ah, numei pasal lou in a om theikei a, pasal leng numei lou in a om thei sam kei hi. Numei, pasal a kipan a pawt a hih bang in, pasal leng numei lak a piang ahi ngal a; himahleh bangkim Pathian a kipan a pawt vek ahi (1 Kor.11:11-12).

Trinity Pathian ah mithum te leng kikim uh a role/function tuam chiat bang in nupa leng kikim a bawl himahleh a role/function uh kibanglou uhi. Khalam ah kikim mahle uh a hih ding mohpuak uh kibanglou uhi. Hiai a mohpuak uh Pathian apan ahi a, kua hiam in khek a hon sawm chiang in nupa kizopna chidamlou hi. Zi a ding a poimoh pen tuh itna ahi.

Kol.3:19 “Pasalte aw, na zite uh it unla, a lak uah hanhat kei un.”

Eph. 5:25 “Pasalte aw, na zite uh it un, Khrist in saptuamte a it a, a sik ua a kipiak bang in.”

Zite a ding a-a poimoh pen tuh it a om chih a kitheih uh ahi. Bryon in hichi’n ana gen hi, “Love to a man is a thing apart…’Tis woman’s whole existence.’ Huaiziak a itna kichi numei a dia poimoh lua ahi. Pasal a dia it pen ding a Pathian in a piak zite ahi chih i lungtang ah vom gige ni. Mi’n amah zi mahmah a it keileh a zi toh pumkhat ahihtak man in amah pumpi mahmah itlou ahi a, a thuaktu ding a itlouh a zi kia hilou in, amahmah zong ahi kha veve hi chih Bible in hon sinsakdan ahi. Kiten zoh nung khawng a chu Pasal te kianga kon it va chihchih ana poimoh khawllou dan uh ahi. Huai thute va gengen sang in na kampau leh na thilhih leh na nasep ah na zahtakna langsak zaw lechin na pasal kipak zaw ding hi. Zite bel hun teng phial a it a om ahihdan uh theihsak gige ngai uhi. Kampau mahmah a leng a pasalte gen za-ut uh ahi. Singkung in tui leh nisa a poimoh gige bang in zite’n itna leh ngaihpoimoh a om ahihna a theih uh poimoh gige uhi. Singkung in tui leh nisa a poimoh zah hon dong chiang in chidam a agah hoihtak hon suang bangin zite’n itna leh ngaihpoimoh a om chih a kitheih chiang un gah hoihtak hon suang ding uhi.

Zi in a pasal in it zoulou chih a kitheih leh pasal te ngaihtuah banlouh, a hihna sungnung tan buaipha uhi. Na zi it hi’n na kithei hia? Na itna bangchi’n na sulang, semkhia a?

Pasal a dia poimoh pen zahna ahi.

Eph.5:22 “Zite aw, Toupa kianga na kiniamkhiak bang un nou mau pasalte kiangah kiniamkhiak un”

Kol. 3:18 “Zite aw, Toupa ah akilawm hun bang zel in na pasalte uh kiang ah kingainiam un” 

Eph.5:33 “Abang abang hileh nou lak a kuapeuh in amah a ki-it bang in a zi it hen; zi mah in leng a pasal zahtak ding in pilvang hen.”

Zite a ding a-a nnasep poimoh pen ding tuh pasalte heutu nna nuai a kiniamkhiakna/submission ahi. Na pasal tawmkan zen a Pathian kiang ah kiniamkhiak hilechin Pathian in hon pom diam? Zite a pasalte thunuai a a om ziak ua a zalenna bitlou/khahsuah ding sakna tuh Feminist te pawl ngaihdan ahi. Amau pawl bel zi leh pasal mohpuakna thu ah buai mahmah uhi. Pasalte thunuai a numeite a om ding hisatheilou in buaipih mahmah uhi. Bible hon gen bang a pasalte thunuai a zite a om chiang un a zalenna uh bit zaw hi.

Bangchi bang a Pasal mai a kiniamkhiak ding? Thutawp genna/final decision peuhmah pasalte piak gige ding ahi. Innsung a pasalte makhelh a vaihawmna laklouh ding. Pasalte’n thupukna a lak theihlouh chiang in zi in a panpih ding ahi. Pathian in pasal panpihtu ding a numei abawl ahi (Gen. 2:18). Hiai panpihtu kichi Hebrew ah ezer (Sam 33:20; 70:5; 115:9) the word refers to God as our help. He is the one who comes alongside us in our helplessness. Philip Payne puts it this way: “The noun used here [ezer] throughout the Old Testament does not suggest ‘helper’ as in ‘servant,’ but help, savior, rescuer, protector as in ‘God is our help.’ The woman was not created to serve the man, but to serve with the man. Without the woman, the man was only half the story. Pasalte zahna piak ding. Zahtak huailou pasal tampi om hi. Himahleh pasal, Pathian batpih leh thupina ahihziak a ngaihthupi ding, zahtak ding ahi. Innsung a nek ding a puaklut ziak a zahtak ding ahi diam? Degree sangpi a neih ziak ahi diam? A hauhsak ziak ahi diam? A mel leh puam ziak ahi diam? Hiaite tunglam pek a Pathian thupina, Pathian batpih a bawl ahihziak uh ahi. Kampau ale pasalte zahna piak ding. Pau. 31:28 Pilna in a kam a ka a; siamna dan a lei ah a om hi. Numei te bangziak a pasalte khut lum thuak khanak sek uh ahia ichihleh genlouh ding tantan, sawk khaklouh ding tantan a gen a sawk khak chiang ua thuak kha nak uh ahi. Pau.25:15 Dohtheih mahmahna in vaihawmpa thuzoh ahi, huan lei nem in guh a hihtan ding hi.

I Peter 3:1 Huchibang in, nou zite aw, noumau pasalte thuthu in om un, huchi in a lak ua khenkhat in Pathian thu umkei mahle uh na tatdan uh zoh in a om ding uhi. Laudansiam kawm a na tatdan siangthou uh en in.

Hiai a i genlouh leng tampi hih ding leh hihlouh ding Bible in a gen om hi. Koppihte mohpuaknate kia theih lenlun in ei mohpuakna i ngaihsak keileh nupa nuamsa leh lohching hithei ngeilou ding hi. Na nupa ua pan nahon laakkhawm chiang un a designtu bawl bangbang in hong kilang ding a etlawm mahmah ding hi.