EMBRACE July 2019

Tutung a kikupkhawm ding a ka hon tel ahihleh Hehna ahi. Hehna kichi mi teng in i neih chi leng gen khial ding in ka kigingta kei hi. Hehna toh kisai gen ding a tam mahmah hi. Tamlou in theihtuak khenkhat en khawm leng kachi hi.

Hehna ahihleh emotion laklak a handle buaihuai pen ahi. A handle dan i siam kei ngialleh tunlouh ding tantan hon tungsak a, utlouh tantan hon sem khesak zaw mah hi. Hehna in suang baang hon phusak thei a, i maban ding hon buaisak thei a, a hoih lam a lah kong (door) hongtu hong suak thei a, thilhoihpi hon tun thei hi. Heh ziak a nasepna a buai le om a, nupa kikhen tampi leng om hi. Heh ziak mah in thil a dik a tang in hong pai thei a, mi zahtaak leng kikai thei hi. Huan ah hehna tuh ei leh ei ki vengbitna ding leh midangte vengbitna ding a i sung a om ahi. I emotion khat ahihna ah heh theilou kuamah ki-omlou hi. Huaiziak tak in bangziak a heh kahia? Bangchi bang a heh kahia? chi kidot poimoh kasa hi. Bible in le heh zaw heh unla himahleh khial kei un achihna bang om a, mun dang khat ah lah hehna tawpsan un chizel hi (Eph.4:26, 31). Bible amah leh amah kikalh kha ahi diam? Hilou, aziak hehna dik om a, hehna diklou om hi. Hehna diklou tuh tawpsan ding ahi. Hiai tegel, hehna dik leh diklou bangchi bang in i thei khen ding a? Hehna dik toh kisai Bible sung ah Pathian, Vaihawmpa diktat ahi, ahi niteng in migiloute tung ah hehna nei Pathian ahi (Sam7:11) achi hi. Jesu, Temple kong a sumdawng te tung ah heh in delhkhia hi (Mat.21:12,13). Kumpi Saul, a mite vengbitna ding in Khasiangthou in hehsak hi (1 Sam.11:6). Hehna dik toh kisai in i Toupa Jesu apan sin ding i nei hi. Damlou khutzaw hihdam ding a akisak lai in Farisai te’n khawlni ahihziak in a thilhih awilou uhi. A lungtang uh a taak ziak in Jesu a lungkham mahmah a, heh kawm in amaute en in damlou ahih dam hi (Mk. 3:1-6). A hehna in Farisaite adelhkhia a damlou in damna a mu hi.

Hehna dik tuh mi kuahiam tung a dikloutak (injustice) a vaihawm saka a om chiang hiam ahihkeileh Jesu Khrist’ min daisak, mualphousak khelhna a om chiang a heh pen hehna dik ahi. Hehna diklou ahihleh lungtang ah mahni kingaih poimoh luatna (self-centredness) ziak ahi. Tua bang mite a heh chiang un a kim a kiang ua omte bang a ngoh ua, amau deihdan zalentak a ahih theihlouh ziak bang, a thilhih uh pompih a om louh ziak bang ahi taangpi hi. A hehma un a hihna uh, a kingaih poimohna uh sukbei a, a om ding lau thawng ua, a zalenna uh vaua a om chiang bang ua lungkham, lau, hihehu uh, huai chianga a lungtang ua om bang bang semkhe dia mansa in om uhi. Hehna toh hon sepkhiak chiang un thil tampi susia uhi. Huan heh chiang a thupukna va bawl pah in a hoih lam sang in a hoih lou lam tun zaw hi. Hichibang a heh utna, na lungtang apan hong suak a om chiang in kitheihmoh bawl kenla hihmang sawm ken. Hihmang sawm in nengdet sawm mah le chin na sung ah a hing gige ahihman in na damtheihna tan hon subuai kha ding a, thil deih huailou leng piang khesak thei lai hi. Huaiziak in gen khiak theih na ding mun, mite kiang a gen khiak hoih hi. Khenkhat in room sung, kuamah omlouhna mun bang ah a hehna tengteng uh gen khesek uhi. A deih huai pen tuh Pathian kiang a gen khiak, kipuan khiak, panpih ngen a thum ding ahi. Paunakte 28:13 Kuapeuh a tatlekna khuh a lohching kei ding. Himahleh kuapeuh huaite thupha tawi a mangngilh in chitna a mu ding hi. David bang a Pathian kiang a lungtang a om tengteng pholhkhiak a panpih nget ding ahi. A hun tak in Khasiangthou in hon panpih ding hi.

Huanah, hehna i neih chiang in i hehna ni in a tumpih louh ding ahi. Ephesate.4: 26, 27 Heh zaw heh unla, khelh zaw khial kei un; na hehna uh ni in tumpih kei hen. Hehna leh kinakna a bei na ding tuh kingaihdamna ahi. Kolosatte 3:13 Kuapeuh in kua tung ah leng thubuai nei hile uchin, kithuakzou chiat in, kingaidam tuah unla, Toupa’n a hon ngaihdam tak bang in kingaidam tuah chiat un.