EMBRACE June 2019

“Dorcas Day – Nute’ Ni 2019”

Tutung in Ni poimoh – Nute Ni, Naupangte Ni leh Pate Ni i zat/zat ding uh toh kizawitawn in gen ding thu tampi om hi. Nulehpa te’n tate i kepna ah poimoh mahmah kasak om a huai toh kisai tamlou kikumkhawm leng kachi hi. Hiai thu ka gelh ziak in ken kahihzou vek kachihna hizenzenlou a, ka zohna ding a pan ala gige kahi zaw hi. Naupang thumangtak Toupa deihdan a hong khantouh na ding un ahihna uh leh ahihtheihna uh (self image ichi diam ah) a hoihlam a-a theih uh poimoh mahmah hi. Huai ding in hiai a nuai a te ensuk leng ka chi hi. 

Unconditionally love (Aziak bei a itna): It a om ahihdan uh naupang in a theih poimoh mahmah hi. A thilhih ziak ua it a om hizaw lou in ta ahih ziak ua it a om ahih dan a theih uh poimoh hi. Nulehpa te’n le i tate a thilhihhoih chiang kia ua it a, a hoihlouh chiang ua lah itna kampau leh mel zaak ding leh muhsak ding omlou chihte chiinlouh ding ahi. A hoihlouh chiang a na tapapa, tanunu chia ki ngoh bawl a kipiak bawl, a hoih chiang ua lah kei ziak ahi chi ut te kihi zel hi. Tate a thumanlouh chiang ua thuhilh na ding a hoih tuh- Ngai in bawi, Nang kon it a himahleh na omdan, leh na thilhih ahih ka deihlouh chi a hoihtak a thuhilh poimoh hi. Tate’n tuh it a om chih a kitheih kan ua poimoh zaw om lou hi. Itna in lauhna omlou lungmuanna nei sak a, secure sak mahmah ding uhi. I Johan 4:18 ah, “Itna ah lauhna a omkei, itna kim in lauhna a delhkhe zawzel hi,…” I lamet bang ua a omlouh hun ua le thuakzoutak a it i hihdan i latsak poimoh lua hi. I Korin 13:4,7 ah, “Itna in a dohzou a, a migi a,… Itna in bangkim a thuak teitei a,..” 

A sense of Worth (Manphatna): Nulehpa te’n i tate manpha ahihdan leh special ahihdan uh i tate mahmah kianga i theihsak uh poimoh hi. Ta thumanglou leh buaihuai i chihte a tangpi’n nulehpa te’n, a manphatdan uh leh a poimohdan uh i latsaklouh ziak uh ahi. Tate a dia hun i piaklouhna in tate poimoh taktaklou chih hon gensak hi. Tate sanga mobile phone ah hun tam pe zaw i hihman in naupang khat in a let chiang in mobile phone ka ut achih in ngaihtuahna saupi hon neisak hi. Ka nulehpa’n kei a ding in hun a nei kei chih ngaihtuahna in kei ka nulehpa ading a manphalou, poimohlou keive chih a chi(seed) a ngaihtuahna uah kituh hi. Huaiziak in i tate’ manphatdan ngaihtuah thak in i tate toh hun zatkawm tam sawm thak ni. A manphat dan uh naupangte’n a hon theihchian chiang un manphattak in hong hing uhi. Pathian mitmuh in leng a thilsiam te a manpha a, a diakkhol in Amah batpih a siam mihingte.  Matthai 10:29-31 Kawlgit nih dal dangka khat in a zuakzel uh hilou hiam? Himahleh a lak ua khat leng na Pa uh theihlouh in lei ah a ke kei ding hi. Na samzangte uh nangawn leng simvek ahi. Huaiziak in lau kei un; kawlgit tampi sang in na manpha zaw uhi.
I tate tung mahmah ah i kampau zatte bangle etthak kul hi. Khenkhate’n tate khawng miphak ding deih luatna lam a tai tawh tot thuah kawm in gamteng sekhesuk zialzial ua suthangpai gawp chih om theih hi. Na khuak a bang om ahia. Mihai, kuamah le pha kei niteh chihchih mawk a tuh a amau leh amau le vangtah leh manphalou kisakna nei ding uhi. A manphatdan uh muhpih a theihsak zel poimoh lua hi.

A sense of Confidence (kimuanngamna): Khopi khawng a khangliante tawh teh in innlam akipan naupangte’n kimuanngamna kitasam mahmah hi a theih in om hi. Inn a nulehpate’n inn a i na sinsaklouh ziak bang, hun tam i piaklouh ziak bang ana hisek hi. LST ah Paunakte 22:6 A paina ding lampi ah naupang chiil in, huan a upat hun nangawn in leng huai a kipan a paimang kei ding hi. Chiil in (To Train) i chih chiang in thadah deuh a hih niangnuang theihlouh, lungsim, tha leh zung tampi seng a kisakkholhna toh tate makaih ding, khansak ding, bawl ding, lamlah ding chihna ahi. Chiil ding chih toh sinsak/hilh ding (Training v/s Teaching) chih a kibatlouhna lianpi om ahi. Sinsaktu in na hih ding dan hon hilh thoh a, Chiiltu in ahihleh na hih ding dan hon hihpih hi. Naupang tampite a tunna ding mun  atun louh ziak uh Nulehpate chiil zohlouh ziak leh thadah ziak ahi. Amau a om thil thawnpiak (gifts), hihtheihna (abilities) tuam deuh, tuamtuam a neihte uh theihsak a hih khan (develop) ding nulehpa’n i panpih ding ahi. I tate gifts leh talents nulehpate’n i phawkpih mahmah ding ahi. A poimoh leh a cheerleaders a le pan ngai ahi. Tate’n nulehpa apan hanthawnna poimoh mahmah uhi. A tan ding ua kilawm phatna piak ding bangle mangngilh kei ni. 

Tate tuh inn thak lam toh kiteh theih hi. Inn a kilam zoh chiang a a nawkkha ding a lou theilou a om tuh huihpi, vuahpi, gial, vuuk chihte leh adang dang ahi. A foundation hiam, a tung khuhna hiam, a baang hiam a hoih kei leh bang a suak phet diam? Naupangte leng a neulai ua hoihtak a inn detdou leh hoihtak a kilam bang a lamkhiat ngai ahi.

Simtu tengteng Toupa deihdan innkuan tungding ding in Toupan hon ompih in hon makaih hen.

Portion: Nambars 25-30

Q1. Niteng thillatte bangbang ahia?
Q2. Israel te dan ah mi’n ta neilou in si leh a gou te kua kianga piak ding ahi?
Q3. Israel mite lak a gamhawm tang lou dingte kuate ahi ua?
Q4. Phinehas in a thah Midian numei min gelh in?
Q5. Pasal leh a zi kal a thuchiam tengteng kuan a kipsak thei in a hih mang thei a?