EMBRACE May 2019

“Halhthakna Chialpi 2019”

Pathian’ Vualzawlna bang loh ding? -Chingngaihlian Tunglut

Pathian’ Vualzawlna lam tuamtuam ah i dong hi. Huai in kipahna nasatak a hon pe sek hi. Sa-lam hi’n Kha-lam thil kipahhuai i muh chiang in, ‘Pathian Vualzawlna tang ihi’ chi in kipahna’ mittui bang luangluang thei hi.

Vualzawlna i chih chiang in Sa-lam a hauhsaknate, lohchinnate, masuannate, damtheihnate, mite deihsaknate etc i donte ahi hi. Hiai Sa-lam a thilhoih i tante phet lou in, Kha-lam a kipahna chituamtuam i muhte leng Pathian Vualzawlna mah ahi chih i thei hi. Toupa’ iitna pen A vualzawlnate tungtawn a chet anuam mahmah mai maw? Halleluiah, Toupa I phat ahi a hon vualzawlna simsenlouh i donte ziak in!

Ahia lah, Toupa’ Vualzawlna thupitak i tante ziak a i kipahna tan ah beisak i hih khak ding lauhhuai mahmah sa ing. Kipahna tan a i beisak sek pen uh i khanmohbawk uh hi in ka chian hi.
Sa-lam leh Kha-lam a vualzawlna i donte mimal/ mahni innkuan a di kia a hum ding hilou hi. Pathian Nnasep daan huaidaan hilou hi. Pathian in mi a vualzawl chiang in hopsawn/khenkhiat di toh mi vualzawl teitei hi.
Gentehna: Sum leh pai/ neih leh lam a vualzawl a om ihih leh, Pathian’ tate tasam a om panpih tuak om gige uh hi. Huchilou a mite tungtawn a hehpihna, zahngaihna, ngaihnatna, deihsakna, ngaihdamna, thumna, iitna etc i muhte, huchi bangmah a piaksawn/hopsawn ding mi ana om gige zel uh hi.
Vualzawlna i donte pen, Amah lam ah i mitte suan a, Amah lam naihna ding a panlakna ding a i zat leh, zang dik i suak ding hi. A lamdang leh thupi mahmah ahih leh, Toupa’n khelh hon kiphawksak na ding hiam /Ama deihlam a i lungsim put a hon heisak na di’n le vualzawlna zang sek hi.

Vualzawlna tampi i dong ta a, hilele i don di zah dong lou i hi kha diam chih hun hong omsek in ka thei hi. Hiaiteng le hun lua i chih hun omsek hi. Huchi di daan mah ahi diam? A hihke’h vualzawlna guitung lou ahi kha diam? Eimah mah in vualzawlna i tan dite ana ki daal kha hizaw sek hi in leng ka thei hi. Aziak hi ding a ka gintat khenkhat te anuai ah aw:
1) Vualzawlna donsate a kipahna chang theihlouh.
2) Mahni adia kia a ana hum.
3) Kisaktheihna a ana zang.
4) Mi vualzawlna dite ana khaktan sak
5) Pathian naihna/Thumanna di a zang kha lou
6) Toupa’n hon muhsak utte i muh utlouh.
7) I tanvou/ ahidi mawng a ngaihkhaak.
8) Vualzawlna tang dia phu i kisak tan om mawk.
9) Kiningching tak a om zen a, thumkhah.
10) Mi vualzawlna tante hazaatna.

A tawpna di’n, Vualzawlna lamkhat a i donte, huaibang chet sese hilou a lamtuam ah piaksawn theih hi. I muhna mite tung mah ah leng apoimoh daan in lamtuam ah piakkik theih a, mituam ah le piaksawn theih ahihlam chiamteh ni.
Gentehna:
1)Zahngaihna i tan leh, sum a piaksawn theih.
2) Sum leh pai i tan leh, iitna suah theih
3) Ngaihdamna i tan leh, Ngaihnatna suah theih.

Pathian’ Vualzawlna don i ki thalawp daan in a piaksawn leng kithalawp di’n i ki hanthawn hi.

Simtute tengteng Toupa Vualzawlna thupitak i tante pesawn zel thei ding in Toupa’n hon panpih chiat hen.

Bible reference: 2 Korinth 9:8-11, Matthai 10:8, Matthai 18:21-35, Paunaakte 11:25-26, Hebrute 13:16, Ephesate 1:3.