EMBRACE October 2019

TUI BEL KI KHANG: – Chinmang Hangshing

Nidang in pitek khat in tuibel lian nih (2) nei in, singzawl khat ah a nawltuak a khai in aliang ah tui luidung ah va paw sek hi. Hiai tuibel te lak ah khat pen kikhang (crack) om a, a khat pen ahih leh a siatna bangmah omlou in tui a dim in pua gige thei hi. Luidung a tui va pua inn a hong tung chiang in a tuibel kikhang pen ah tui a kim chiang lel pha zou ham hi.

Huchi bang in hiai pitek in niteng in luidung ah tui va pua gige hi. Hunte hong pai zel in kum bangzah hiam nung in a tuibel kikhang pen in a melsiat leh a hoihlouhna ziak a a hih di / sep di bang kim khat lel hihthei ahihman in kisuanglah petmah in siamkitang lou hi. A tawp in tuidung ah pitek kiang ah hichi in hon gen khong hi. “Ki suanglah petmah kahi. Ka khang na, ka hoihlouh na ziak in tui a kim khat di mahmah lampi dung ah ka tak khesak gige a, a kim khat vuak inn hon tutsak zou hamham kahi.”

Pitek in nuihmai tak in, “I lampi pai gige na mun ah paak (flower) nang ka hon puak na lam vuak ah om a, a langkhat lam, bel hoih ka puak nalam a omlou ahih lam na mu ngei hia? Na hoihlouh na a om lam ka theih ziak a, nang ka hon puak na di lampang a lampi nawl teng a pak ka tuh ahi. Niteng a tuipua a ikik lam chiang a nang hiai pak t etui pe ngal nahi.”

“Nang ziak a hiai pak te’n innsung kilawm sak in namtui sak mahmah hi. Nang tua na hoihlouh na toh omlou hilechin, hiai innsung etlawm sak leh namtui sak ding omlou ding hi.”

Hiai tuibel khang bang in na om kha ngei hia – hoihlou kisa a siam kitanlou? Na hinkhua ah banghiam hiai tuibel bang a hon khang sak a om kha ding. Kuapeuh hichi bang a ki ngaihtuah khak hun neih chiat a gintak huai hi. Himahleh ina phawk khaklouh leh ngaihtuah khaklouh sek uh tuh thil bangkim tung a thunei Pathian hing nei ihi uh. Aman mi teng a kibang lou ngen di a A hon bawl ahi a, Amah ah k inga le hang thil lamdang tak hong tungsak thei gige hi.

“Ka hehpihna nang di’n a hun, ka thilhihtheihna hatlouhna ah ahi hihkim a a om” – 2 Korinthte 12:9

Kuamah gen baanglou, hoih bukim ki omlou hi – I Toupa Jesu lou ngal. “Himahleh Pathian in khovel a it mahmah ziak in a Tapa tang neihsun a pia hi” (Johan 3:16). Huchi ahih ziak in Pathian in mi gen baang te, mi hoih bukim lou te leng hon iit vek ahi chih ithei hi. Thamlou in, “Pathianin a hon itna a langsakta mi khialte i hih laia Kris I sika a sihna ah” (Rom-te 5:8).

Mi hoih hih ka sawm sek a, mi te ka nuih mai ka langsak sek a, ka biang (cheek) lehlam ka doh sawm sek a, mi toh ki nak khak chiang in leng ka dawngkik sawm kei teitei a, mi teng toh kituah ka sawm sek hi. Thil a hoihlam ngen in lak kasawm a, thum gige ka sawm a, kei sang a mite a lian zaw in ka koih sawm gige hi. Hiai teng sawm mah leng thilhoih hih ding leng ka siam kei. A changin Kristian kichih ding leng ka kisuanglah in siam ka ki tan kei. Bukim louh na in ka dim hi. A changin Pathian in kei A hon it ding leng ka gingta kei dek hi – a diak in thei gegu napi a ka khelh teitei chiang in.

Himahleh thu kipah huai petmah hiai a om hi – Pathian in eite a hon iitna gaakna omlou (unconditional), it tawplou a hon it, chikchiang mah a beilou ding hi. PATHIAN IN TUA SANG A A HON IT ZAWK NANG IN NA HIH THEIH BANGMAH A OM KEI A, A HON IT TAWM DEUH NANG IN LENG BANGMAH NA HIH THEI SAM KEI.

Ei mihingte hiai a tuibel kikhang bang a genbaang leh hoih bukim lou ngen ihi ua himahleh hiai ihoihlouh na teng thei gegu napi in Pathian in gaakna omlou in hon iit veve hi.

Bible a Chitlouh na etteh na [Johan 18:25-40]:
Huan, Simon Peterin dingin meilum a awi a. Huan, Nang leng a nungjuite laka pang sam na hi hia? a chi ua. Aman, Ka hi kei, chiin, a kitheihmohbawla. Huan, simapu lianpu sikha khat, Peter bil sat khiak sanggamin, A kiangah, huan ah ka honmu kei maw? a chi a. Huchiin Peterin a kitheihmohbawl nawn a; huan, ak a khuang pah ngal hi.

Mi tampi ten iki phok sek mah bang un Simon Peter in leng Toupa Jesu a ding in muanhuai lou leh zumpih in kitheihmoh bawl ahih dan a kiphawk hi. Chinglou kisak na neih puakkik lianpi khat ahi.

Hiai a tung a I Bible tang sim uh Peter tangthu bei na hilou ahi. I Toupa Jesu thohnawn nung in Peter kiang ah a kilak a, a pukna, a chitlouh na, a bukim louh na ngaihdam in mohpuak na thupi tak guan thak nawn hi [21:15-25].

Robert H. Schuller in a chihmah bang in, “With Jesus, failure is never final”. Peter in zuausan kha mah leh IToupa Jesu in Peter puakkik puak sak in ngaidam lai in khovel pumpi theihphak in thupitak in zanglai zawmah hi.